ನವದೆಹಲಿ : ಕ್ಯಾನ್ಸರ್ ಮಹಾಮಾರಿಯ ವಿರುದ್ಧ ಹೋರಾಡುತ್ತಿರುವ ರೋಗಿಗಳಿಗೆ ಮತ್ತು ಅವರ ಕುಟುಂಬಗಳಿಗೆ ಚಿಕಿತ್ಸಾ ವೆಚ್ಚದ ಭಾರ ತಗ್ಗಿಸಲು ಕೇಂದ್ರ ಸರ್ಕಾರ ನೆಮ್ಮದಿಯ ಸುದ್ದಿ ನೀಡಿದ್ದು, ವಿವಿಧ ಜೀವರಕ್ಷಕ ಔಷಧಿಗಳ ದರ ಶೇ.70 ರಷ್ಟು ಕಡಿತ ಮಾಡಿದೆ.
ಕೇಂದ್ರ ಸರ್ಕಾರದ ರಸಾಯನಿಕ ಮತ್ತು ರಸಗೊಬ್ಬರ ಸಚಿವಾಲಯದ ವ್ಯಾಪ್ತಿಗೆ ಬರುವ ರಾಷ್ಟ್ರೀಯ ಔಷಧ ಬೆಲೆ ನಿಯಂತ್ರಣ ಪ್ರಾಧಿಕಾರ (NPPA) ಹೊರಡಿಸಿರುವ ಮಹತ್ವದ ಆದೇಶದ ಅನ್ವಯ, ಪ್ರಮುಖ ಔಷಧ ತಯಾರಿಕಾ ಸಂಸ್ಥೆಯಾದ ಟೊರೆಂಟ್ ಫಾರ್ಮಾಸ್ಯೂಟಿಕಲ್ಸ್ ಲಿಮಿಟೆಡ್ ತನ್ನ ಪ್ರಮುಖ ಕ್ಯಾನ್ಸರ್ ಔಷಧಿಗಳ ಗರಿಷ್ಠ ಚಿಲ್ಲರೆ ಮಾರಾಟ ದರವನ್ನು (MRP) ಗಣನೀಯವಾಗಿ ಕಡಿತಗೊಳಿಸಿದೆ. ಈ ದರ ಕಡಿತದ ಸಾರ್ವಜನಿಕ ಪ್ರಕಟಣೆಯ ಪ್ರಕಾರ, ಪರಿಷ್ಕೃತ ನೂತನ ದರಗಳು 2026ರ ನವೆಂಬರ್ 9 ರಿಂದಲೇ ದೇಶಾದ್ಯಂತ ಜಾರಿಗೆ ಬರಲಿವೆ.
ಟೊರೆಂಟ್ ಫಾರ್ಮಾ ಉತ್ಪಾದಿಸುವ ಜೀವರಕ್ಷಕ ಕ್ಯಾನ್ಸರ್ ಇಂಜೆಕ್ಷನ್‌ಗಳ ಪೈಕಿ ಅತ್ಯಂತ ದುಬಾರಿಯಾಗಿದ್ದ 'ಬೆವಾಕಾಲ್ಪ್ 400 ಎಂಜಿ' (BEVAKALP 400 MG) ಒಂದು ವಯಲ್‌ನ ಹಿಂದಿನ ಗರಿಷ್ಠ ಚಿಲ್ಲರೆ ದರ 42,000 ರೂಪಾಯಿ ಇತ್ತು.
ಇದೀಗ ಪರಿಷ್ಕರಣೆಯ ನಂತರ ಅದರ ದರ ಬರೋಬ್ಬರಿ 28,864 ರೂಪಾಯಿಗಳಷ್ಟು ಇಳಿಕೆಯಾಗಿದ್ದು, ನವೆಂಬರ್ 9 ರಿಂದ ಕೇವಲ 13,136 ರೂಪಾಯಿಗೆ ರೋಗಿಗಳಿಗೆ ಲಭ್ಯವಾಗಲಿದೆ.
ಇದೇ ಔಷಧದ 'ಬೆವಾಕಾಲ್ಪ್ 100 ಎಂಜಿ' ಇಂಜೆಕ್ಷನ್ ದರವು ಈ ಹಿಂದೆ 10,500 ರೂಪಾಯಿ ಇತ್ತು, ಈಗ ಅದನ್ನು ಸುಮಾರು ಶೇಕಡಾ 57ರಷ್ಟು ಇಳಿಸಿ 4,523.90 ರೂಪಾಯಿಗೆ ನಿಗದಿಪಡಿಸಲಾಗಿದೆ.
