ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ (Bengaluru ) ಮಾದಕ ವಸ್ತು (illegal Substance ) ಜಾಲದ ವಿರುದ್ಧ ಸಮರ ಸಾರಿರುವ ಸಿಸಿಬಿ (Central Crime Branch) ಪೊಲೀಸರು ಮತ್ತೆ ಭರ್ಜರಿ ಬೇಟೆಯಾಡಿದ್ದಾರೆ.
ಮಹಿಳೆಯರ ಚೂಡಿದಾರ್ ವಸ್ತ್ರಗಳ ನಡುವೆ ಅಡಗಿಸಿ ತರಲಾಗುತ್ತಿದ್ದ ಬರೋಬ್ಬರಿ ₹26.60 ಕೋಟಿ ಮೌಲ್ಯದ ಎಂಡಿಎಂಎ (MDMA) ಮಾದಕ ವಸ್ತುವನ್ನು ಜಪ್ತಿ ಮಾಡಿದ್ದು, ಅಂತರರಾಜ್ಯ ಡ್ರಗ್ ಪೆಡ್ಲರ್ಗಳ ಜಾಲವನ್ನು ಸಂಪೂರ್ಣವಾಗಿ ಮಟ್ಟಹಾಕಿದ್ದಾರೆ.
ದೊಡ್ಡ ಮಟ್ಟದ ವಸ್ತ್ರ ವ್ಯಾಪಾರದ ನೆಪದಲ್ಲಿ ನವದೆಹಲಿಯಿಂದ ಬೆಂಗಳೂರಿಗೆ ಚೂಡಿದಾರ್ ಬಟ್ಟೆಗಳ ಪಾರ್ಸಲ್ ಸಾಗಿಸಲಾಗುತ್ತಿತ್ತು.
ಈ ಬಟ್ಟೆಗಳ ಮಡಿಕೆಗಳ ಮಧ್ಯೆ ರಹಸ್ಯವಾಗಿ ಎಂಡಿಎಂಎ ಕ್ರಿಸ್ಟಲ್ ಹಾಗೂ ಕೊಕೇನ್ ಪೌಡರ್ ಅನ್ನು ಅಡಗಿಸಿಟ್ಟು ಸಾಗಣೆ ಮಾಡಲಾಗುತ್ತಿತ್ತು. ಪೊಲೀಸರ ಕಣ್ಣಿಗೆ ಮಣ್ಣೆರಚಲು ಜಾಲ ರೂಪಿಸಿದ್ದ ಈ ವಿಭಿನ್ನ ತಂತ್ರ ಸಿಸಿಬಿ ಅಧಿಕಾರಿಗಳ ಸೂಕ್ಷ್ಮ ಕಾರ್ಯಾಚರಣೆಯಿಂದಾಗಿ ತಕ್ಷಣಕ್ಕೆ ಬಯಲಾಗಿದೆ.
ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಾಹಿಲ್ ಕುಮಾರ್, ಸತ್ಯಂ, ಕಲೀಮ್ ಹಾಗೂ ಕನ್ನಯ್ಯ ಎಂಬ ನಾಲ್ವರು ಆರೋಪಿಗಳನ್ನು ಬಂಧಿಸಲಾಗಿದೆ. ಬಂಧಿತರಿಂದ ಒಟ್ಟು 12.925 ಕೆಜಿ ತೂಕದ ಎಂಡಿಎಂಎ ಹಾಗೂ 60 ಗ್ರಾಂ ಕೊಕೇನ್ ವಶಪಡಿಸಿಕೊಳ್ಳಲಾಗಿದೆ.
ದೆಹಲಿಯಲ್ಲಿದ್ದ ನೈಜೀರಿಯನ್ ಪ್ರಜೆಯಿಂದ ಈ ಡ್ರಗ್ಸ್ ಪಡೆದು, ಬೆಂಗಳೂರಿನ ಐಟಿ ನೌಕರರು ಹಾಗೂ ಕಾಲೇಜು ವಿದ್ಯಾರ್ಥಿಗಳಿಗೆ ದುಬಾರಿ ಬೆಲೆಗೆ ಮಾರಾಟ ಮಾಡಲು ಸಂಚು ರೂಪಿಸಲಾಗಿತ್ತು.
ಈ ಹಿಂದೆ ಸಿಸಿಬಿ ಬಲೆಗೆ ಬಿದ್ದಿದ್ದ ಪ್ರಮುಖ ಆರೋಪಿಗಳು ನೀಡಿದ ಸುಳಿವು ಆಧರಿಸಿ ಮಾದಕ ದ್ರವ್ಯ ನಿಗ್ರಹ ದಳ ಈ ಯಶಸ್ವಿ ದಾಳಿ ನಡೆಸಿದೆ.
ಸದ್ಯ ರಾಜಧಾನಿಯಲ್ಲಿ ಮಾದಕ ಜಾಲವನ್ನು ಬೇರುಸಹಿತ ಕಿತ್ತೊಗೆಯಲು ತನಿಖೆ ತೀವ್ರಗೊಳಿಸಲಾಗಿದ್ದು, ಈ ಅಂತರರಾಜ್ಯ ಕೃತ್ಯದ ಹಿಂದಿರುವ ಮೂಲ ಸರಬರಾಜುದಾರರಿಗಾಗಿ ಸಿಸಿಬಿ ಪೊಲೀಸರು ಶೋಧ ಕಾರ್ಯ ಚುರುಕುಗೊಳಿಸಿದ್ದಾರೆ.
